គេច្រើននិយាយលេងថា លុយមិនមែនជាបញ្ហាទេ ប៉ុន្តែអត់លុយទើបជាបញ្ហា។ ហើយសម្រាប់មនុស្សភាគច្រើនលុយជារបស់ដែលពិបាករកតែស្រួលចាយណាស់។ ហេតុដូច្នេះហើយបានជាបុគ្គលជោគជ័យមួយចំនួនបានចែករំលែកអាថ៌កំបាំងធ្វើយ៉ាងណាឱ្យមានភាពវៃឆ្លាតក្នុងការចំណាយនិងសន្សំលុយដើម្បីភាពរីកចម្រើនទាំងក្នុងជីវិតនិងអាជីព។
១/ រៀបចំផ្តល់អាទិភាពដល់គោលដៅវែងឆ្ងាយ
ការសន្សំលុយកាក់ដើម្បីចូលនិវត្តន៍គួរតែមានអាទិភាពជាងការបែងចែកលុយកាក់សម្រាប់ចំណាយលើការអប់រំរបស់កូនពេលចូលរៀនមហាវិទ្យាល័យ។
២/ រៀបចំនិងពិនិត្យបញ្ជីចំណាយចំណូលជាមួយគ្រួសារ
ការផ្ទៀងផ្ទាត់ និងរៀបចំការចំណាយលុយកាក់ជាមួយគ្រួសារអាចជាវិធីល្អមួយដើម្បីបង្ហាញតម្លាភាព និងបំបាត់រាល់បញ្ហាមិនទុកចិត្តគ្នា។
៣/ ត្រូវចេះអត់ធ្មត់
សន្សំលុយដោយអត់ធ្មត់មិនចំណាយផ្តេសផ្តាសរហូតដល់ពេលអ្នកមានលុយទិញរបស់ដែលអ្នកចង់បានដូចជារថយន្ត របស់ចាំបាច់ប្រើប្រាស់ក្នុងផ្ទះ ឬដំណើរកម្សាន្តលំហែកាយទៅកន្លែងណាមួយ។
៤/ ចេះថ្លឹងថ្លែងគណនី
ទម្លាប់ថ្លឹងថ្លែងគណនីលុយកាក់ដែលមានជួយអ្នកឱ្យចាប់ផ្តើមត្រួតពិនិត្យតាមដានរាល់ការចំណាយខុសខ្ទង់និងប្រកាន់ខ្ជាប់ទៅនឹងគម្រោងថវិកាដែលបានគិតទុក។
៥/ ប្រើគណនីសន្សំនិងគណនីចរន្តរបស់ធនាគារខុសគ្នា
ប្រសិនបើអ្នកមិនឃើញចំនួនលុយដែលមាននៅក្នុងគណនីសន្សំនៅពេលដែលអ្នកដកយកលុយកាក់ប្រើប្រាស់ជាញឹកញាប់ពេកទេ អ្នកនឹងមិនសូវមានអារម្មណ៍ច្រាសច្រាលចង់ចាយច្រើនទេ។
៦/ រៀបចំលុយកាក់ទុកក្នុងស្រោមសំបុត្រសម្រាប់ចាយប្រចាំខែ
នៅពេលអ្នកចាយលុយដែលបានរៀបចំទុកក្នុងស្រោមសំបុត្រមួយសម្រាប់មួយខែ អ្នកត្រូវតែរង់ចាំដល់ខែបន្ទាប់ដើម្បីបើកស្រោមសំបុត្រមួយទៀតសម្រាប់ចំណាយក្នុងខែបន្ទាប់។
៧/ ត្រូវមានលុយកាក់បម្រុងពេលចាំបាច់
កញ្ចប់ថវិកានេះអាចចាត់ទុកថា ជាឆត្រយោងរបស់ក្នុងករណីបាត់បង់ការងារ ឬមានការចាំបាច់ត្រូវចំណាយច្រើនកើតឡើងភ្លាមៗ។ អ្នកក៏គួរតែបង្កើតមូលនិធិមួយផ្ទាល់ខ្លួនសម្រាប់ការចំណាយតិចតួចដែលអាចកើតឡើងម្តងម្កាលដូចជាសម្រាប់ថ្នាំពេទ្យ ឬថ្លៃជួសជុលរបស់ប្រើប្រាស់ប្រចាំថ្ងៃជាដើម។
៨/ ទទួលស្គាល់អំណាចទឹកប្រាក់
ការចាយលុយជាសាច់ប្រាក់អាចជួយឱ្យអ្នកមានឥទ្ធិពលច្រើនក្នុងការចចារឬតថ្លៃ ហើយទំនោរបស់អ្នកក្នុងការមិនចង់ចេញលុយឱ្យផុតពីដៃក៏អាចជួយទប់ចិត្តអ្នកមិនឱ្យភ្លឺតភ្លើនទៅតាមការចង់បានដែរ៕
Comments
Post a Comment